د يوې زمکې ګڼ شاعران څۀ عجیبه ده‘ چې ستا خوا کښې بې ثمر شي سړے لــۀ خپل نظــر پرېــــوځي څـــۀ به معتبر شي سړے دومره ښائست چې د دې ښار پۀ...
د يوې زمکې ګڼ شاعران
څۀ عجیبه ده‘ چې ستا خوا کښې بې ثمر شي سړے
لــۀ خپل نظــر پرېــــوځي څـــۀ به معتبر شي سړے
دومره ښائست چې د دې ښار پۀ جام کښې نۀ ځائیږي
لۀ خپلــــه خاکــــه پۀ کوم کوم پسې بهــر شي سړے
دومــــره اُوږده ده دا د ځــــان د پېـــــژنــدنې لاره
دومــــره اُوږده ده چې بس ستړے پۀ سفر شي سړے
ژوند کښې دهجــــر نه یؤ ځل راتېـــــرېدۀ پکار دي
نور څۀ کۀ نۀ شي، د خپل ځان نه خو خبر شي سړے
دا خلـــق ولې د رنځــــورو ستـــــــرګو حـــال پټــوي
تسنیمه ! درست دې عطـر دان ټول دې اګر شي سړے
ارواښاد رياض تسنيم
------------------------------------------
چې د رقيب غوندې بې زوره زورَور شي سړے
زړګيه څۀ دې خيال دے دۀ له خو چې ورشي سړے
هسې تپوس کوم چې روغ به ترې راتلے شي کۀ نه ؟
چې د تېرو تېرو بڼو سره په شر شي سړے
پکار خو دا ده چې د چا سره خلۀ نۀ ګډوي
پکار خو دا ده چې لۀ هر چا مرور شي سړے
تاوان ئې دا دے چې د هر پښتون په اوښکو کښې دے
ګټه ئې څۀ ده چې پۀ دې لوبه کښې سر شي سړے
د پښتنو د ژوند احساس به ورته هله وشي
چې د پښتون پۀ شان پخپله در په در شي سړے
لوهاره هله به د هر څۀ نه خبر شي سړے
چې دخپل ذات د دائرې نه رابهر شي سړے
فضل رحيم لوهار
--------------------------------------------
کوئی تبصرے نہیں
Hi