یاسر حمید وزیر ممتاز اورکزے

  زه پخپله هم شعر او غزل لیکم،خو د ممتاز اورکزي شاعري تشريح د خپلو الفاظو په ژبه کول ما ته ښه نه ښکاره کېږي، ممتاز يو ډېر لوړ معيار شاعر دی،...

 

زه پخپله هم شعر او غزل لیکم،خو د ممتاز اورکزي شاعري تشريح د خپلو الفاظو په ژبه کول ما ته ښه نه ښکاره کېږي، ممتاز يو ډېر لوړ معيار شاعر دی،د هغه شعرونه ژور، معنوي او د انسان د روح د ژورو احساساتو ترجمان دي،خو کله چې خلک د هغه يو وائرل غزل په اړه غير سنجیده چلند کوي، او مزاق پرې کوي زه هم مجبوره شوم،چې د خپلې محدودې عقل او پوهې له مخې د هغه شعور او اشعارو تشريح وکړم زه پوهېږم چې زما تشريح د ممتاز د اصلي شاعرۍ د ژورتيا او معنويت بشپړ عکس نه شي ښودلی خو د دې لارې ما غوښتل چې د خلکو بې پروايۍ او د هغه د شعر د کمزوري درک پر وړاندې یو څه وضاحت ورکړم،

بیت ۱

زه مارغه بې پر او باله

نه مې خاښ شته او نه مې ځاله

تحلیل:

دا بیت د وجودي تنهایۍ او د داخلي یتیمۍ څرګندونه کوي شاعر ځان د وزرونو او پرونو له فقدان سره تشبیه کوي، چې د حرکت او پرمختګ وسیله نه لري نه د ژوند لپاره خوندي ځای لري او نه هم د آرامښت تم ځای دې تصویر کې مرغه د آزادۍ او امیدونو علامت دی خو همزمان د غیر یقینی او بې وزلۍ په حال کې ښودل شوی شاعر موږ ته وايي چې بهرني عوامل مهم نه دي، اصلي زندان د انسان د داخلي فکر او زړه کې دی

بیت ۲

لا ژوندی یم خو ځورېږم

له مثقاله تر مثقاله

تحلیل:

شاعر د ژوند د درد دقیق وزن څرګندوي هره لحظه د ځور احساس لري او لکه چې د مثقال په اندازې د هر درد ارزونه کوي دلته ژوند یوازې د موجودیت لپاره نه دی بلکې د هرې لحظې د رواني او فکري کړاوونو مجموعه ده شاعر د خپل شعوري او غیر شعوري درد حسابوي او موږ ته د انساني ژوند ناپایداره طبيعت ښيي

بیت ۳

ما له سوخته لته درکړه

د دنیا غوندې فټباله

تحلیل:

په دې بیت کې د غوسې او احساساتو شدت څرګند دی شاعر داخلي ناراحتي د فټبال سره تشبیه کوي د نړۍ له بې ثباته حالاتو سره د خپلو احساساتو مقابله د فزیکي چلند او رواني وضعیت په بڼه کوي دا تشبیه د داخلي اضطراب او رواني فشار فلسفي انعکاس دی

بیت ۴

له انکاره تر ایمانه

هیڅ هم نشته لا زواله

تحلیل:

شاعر د باورونو د ناپایدارتیا فلسفه وړاندې کوي هېڅ شی دایمي نه دی نه انکار نه ایمان هر څه د وخت تابع دي دلته شاعر موږ ته یادونه کوي چې د ژوند ټولې انساني تجربې عارضي دي او د هر څه دوام محدود دی

بیت ۵

نن سبا یم لږ بې سُره

خو هر ګز نه یم بې تاله

تحلیل:

دا بیت د داخلي موسیقۍ د نیمګړتیا او د رواني بې قراري نښه ده سُر او تال د شاعر د داخلي توازن او د احساساتو د همغږۍ علامت دی شاعر وايي چې که څه هم نظم او ترتیب لږ کمزوری دی خو داخلي انرژی او ژوند پوره پاتې دی

بیت ۶

د کلال د زړه له حاله

نا خبره پشکاله

تحلیل:

شاعر د نورو د احساساتو او هیلو سره د ځان تړاو ښيي د کلال زړه د بشري امیدونو او اضطرابونو د انعکاس ځای دی پشکاله د ناڅاپي او نامعلومو شرایطو سمبول دی دلته شاعر د انساني ژوند د پیچلو حالاتو فلسفي عکس وړاندې کوي

بیت ۷

ولې ویښ یم هسې ویښ یم

ځه اوده شه انډیواله

تحلیل:

دا بیت د نیمه شپه داخلي مکالمه او ځان سره خبرې څرګندوي شاعر یوازې دی او د خپلو فکرونو په دریځ کې د ځان مخاطب دی د ذهن او زړه دوه شتونونه یې په مکالمه کې څرګند شوي شاعر په دې بیت کې د انسان د ځان پیژندنې او داخلي تضاد فلسفه ښيي

بیت ۸

د مغل ده که د بل ده

څوک مزدور مه شه خوشاله

تحلیل:

شاعر د تاریخ او سیاست استعاره کاروي مغل او بل د قدرت متضاد استازي دي دلته شاعر موږ ته وايي چې د بهرنیو ځواکونو تر اغیز لاندې نه ژوند وکړو د انساني آزادۍ او خپلواکي فلسفه د شاعر په ژبه بیان شوې

بیت ۹

ممتاز ګیر د ځان په جال کې

عجیب ګیر دی ذوالجلاله

تحلیل:

شاعر د ځان دننه زندان او د وجود د محدودیت تصویر وړاندې کوي ګیر کېدل د فکر او احساس د زنجیرو په معنی دی دلته شاعر د انساني روان د محدودیتونو فلسفي څیړنه کوي او موږ ته ښيي چې اصلي زندان د انسان په ذهن کې دی.

یاسر حمید وزیر

ممتاز اورکزے