صابر شینواری

  غزل چې يا مجبوره شي او يا چرته معتوب شي خلک نو بيا له ما سره خواږۀ شي او محبوب شي خلک کۀ څوک پۀ تن کړي شنه جُبه او څوک دستار پۀ سر کړي خدا...

 

غزل

چې يا مجبوره شي او يا چرته معتوب شي خلک

نو بيا له ما سره خواږۀ شي او محبوب شي خلک

کۀ څوک پۀ تن کړي شنه جُبه او څوک دستار پۀ سر کړي

خدايږو کۀ بيا هم په سړيو کې محسوب شي خلک

عجيبه دا ده چې زما د يوۀ عيب پۀ سبب

دا شرمنده ولې شي، او ولې معيوب شي خلک؟

تر څو به زۀ آداء کومه کفاره د نورو

آخر يو ځلې خو دې هم چرته مصلوب شي خلک

د هغې ورځې د ليدو پۀ انتظار يمه زۀ

چې ګناه ما کړې وي خدايه او مطلوب شي خلک

صابره زۀ به هغه وخت هم غنيمت رانۀ وړم

چې دنيا اور واخلي د سيلمې او مغلوب شي خلک