حمزه شينواری

  هر کله نظر چې د اشنا مهرباني کا ما د بېلتانه د تېرو ورځو ارماني کا اوس چې اشنا ستا په ژبه زه یم پوهېدلې هره وینا ستا د یو انداز ترجماني کا...

 

هر کله نظر چې د اشنا مهرباني کا

ما د بېلتانه د تېرو ورځو ارماني کا

اوس چې اشنا ستا په ژبه زه یم پوهېدلې

هره وینا ستا د یو انداز ترجماني کا

مه وړاندې کوئ ورته سرونه په بها کښې

لا د دې په هورته په دیدن کښې به ګراني کا

ډېر لباس که وکړمه خو حال مې څرګندېږي

تېښته لکه څو چې د تصویر نه عریاني کا

څوک چې په طلب کښې مېړنی لکه مېږی وي

هغه به حاصله دبدبه سلیماني کا

ښه ده چې ګرداب د بېلتانه شته په الفت کښې

ډېر چې تاؤ راتاؤ شي لا به ډېره راواني کا

مه ګڼه عارف ئې ، ائینه ئې د ناقصه

څوک چې راڅرګنده کله کله حېراني کا

زړهٔ چرې د ښکلیو په وعدو نه جمع کېږي

زیاته التفات ئې یو په دوه پرېشاني کا

سرای د دنیاګۍ ته چې کاروان د سپرلي راشي

جوړه په هر لور د دیدنونو ارزاني کا

وروسته د حمٓزه غوندې هغه نه پاتې کېږي

څوک چې په طلب کښې خپل سرونه قرباني کا